ස්වභාවික පිළියම් දහයකින් ඉක්මනින්ම හිසරදය සුව කරගමු
1,528 Views
තෙහෙට්‍ටුව සහා ආතතිය නිසා බොහෝ අවස්ථාවල හිසරදය ඇතිවීම සිදුවේ. කාර්යබහුල දවස අවසානයේ බොහෝ දෙනෙක් මේ හිසරදය ඇතිවීම නිසා පීඩා විඳිති. හිසරදයක් දැනුණු ගමන් වේදනානාශක පෙත්තක් බොන්න බොහෝ අය පුරුදු වෙලා සිටිනවා.නමුත් ඊට කළින් ඔබට උත්සක කර බලන්න පුළුවන් , හිසරදය නැතිනම් ඔලුවේ කැක්කුම සමනය කරගැනීමට උපකාරී වන සරල පිළියම් කිහිපයක් ගැනයි අද අප ඔබට කියාදෙන්නට යන්නේ.
1. වතුර පානය කරමින් සිරුරේ සජලතාව පවත්වාගන්න – සමහර අධ්‍යයනයන් වලට අනුව හිසරදය සඳහා නිදන්ගත විජලනය ද හේතුවක් වේ. විජලනය වීම ඔබේ මානසික ඒකාග්‍රතාවට බලපෑම් කළ හැකි අතර ඔබ තුළ නුරුස්නා බවක් ඇතිකරයි. ඉන් ඔබේ හිසරදය වඩාත් නරක අතට හැරිය හැක. වතුර පානය කිරීමෙන් පැය බාගයක් පමණ ගත වෙද්දි ඔබේ හිසරදය ගතිය සුවවී යනු ඇති බව අධ්‍යයන මඟින් පෙන්වාදෙයි.ඔබට නිතර හිසරදය තත්වයන් ඇතිවෙනවා නම්, දිනකට වතුර ලීටර් 1.5-2 අතර ප්‍රමාණයක් පානය කිරීම ඔබේ පුරුද්දක් කරගන්න. වතුර බහුල ආහාර වර්ග ද පරිභෝජනයට එක්කරගන්න.
2. ඉඟුරු තේ - ඉඟුරු තේ වල ඇති ඖෂධිය ගුණ වේදනාශකයක් ලෙස ක්‍රියාකරයි.මෙය මිග්‍රේන් තත්වයට ගුණදායක බව ඇතැම් අධ්‍යන පෙන්වාදේ.උණුසුම් ඉඟුරු තේ කෝප්පයක් පානය කිරීම, ඉඟුරු අතිරේක පෝෂකයක් ලබාගැනීම, හෝ තනුක කළ ඉඟුරු තෙල් බිංදු කිහිපයක් නළල දෙකෙලවර, නළල,බෙල්ලේ හා පිට කොන්දේ ගල්වා මෘදුව සම්බාහනය කිරීම හොඳ පිළියම් වේ.
3. කෝපි හෝ කැෆේන අඩංගු පානයක් ලබාගන්න - කැෆේන් අධික ලෙස පානය කිරීම ඇත්ත වශයෙන්ම ඔබේ හිසරදය වඩාත් නරක අතට හැරිය හැකි බව අමතක නොකළ යුතුයි. කැෆේන් යනු විජලනකාරකයක් නිසා මේවා අධිකව ලබානොගැනීම ඉතා වැදගත් වේ.නමුත් සීමිත ප්‍රමාණයකට අනුව කැෆේන් පරිභෝජනය කිරීමෙන් හිසරදය වැනි වේදනා අපහසුතාවන්ට සහනයක් ලබාගත හැකිවේ. ඔබ කෝපි වලට කැමති කෙනෙක් නම් කැෆේන් එතරම් අඩංගු නොවන decaffeinated වර්ගයේ කෝපි සුලු ප්‍රමාණයක් පානය කරන්න.
4. කෙටි නින්දක් ලබාගන්න - නින්ද නොමැතිකම එකකට වඩා බොහෝ ආකාරවලින් සෞඛ්‍යයට අහිතකර ය. හිසරදයක් පමණක් නොව, ඔබට තෙහෙට්‍ටුව ,අප්‍රාණිකබව වැනි අපහසුතා ද දැනෙනු ඇත. නින්ද අඩුකම නිසා ඇතිවන හිසරදයට එකම පිළියම හොඳ නින්දක් ලබාගැනීමයි.ඇතම් අයට දිගු වෙලාවක් පරිගණක හෝ දුරකථන තිරය දෙස බලාගෙන සිටිම නිසා ඇස් වලට හා මොළයට අවිවේකි බවක් ඇති විය හැකියි. මෙය හිසරදයක් ලෙස මතුවිය හැකියි.කැෆේන් පානයක් ලබාගැනීමෙන් පසු කෙටි නින්දක් ලබාගන්න. ඉන් ඔබේ සිරුරට හොඳ විවේකයක් ලැබේවි.
5. සන්සුන් වන්න (relax) - මානසික ආතතිය හිසරදයට ප්‍රධාන හේතුවක් විය හැකිය. මානසික ආතතිය දුරු කරන ව්‍යායාම හෝ ක්‍රියාකාරකම් කිරීමෙන් හිසරදයේ තීව්‍රතාවය අඩු කර ගත හැකිය. නිතිපතා යෝගා කිරීම, ස්ට්‍රෙචිං අභ්‍යාස කිරීම, ශ්වසන ව්‍යායාම හෝ භාවනා කිරීම හිසරදය අඩු කර ගැනීමට උපකාරී වේ.
6. සීතලෙන් තවන්න - සීතලෙන් තැවිම ඉරුවාරදය සඳහා විශේෂයෙන් ක්‍රියාකාරී වන අතර ඕනෑම ප්‍රදාහය හෝ වේදනා තත්වයක් සමනය කරයි. පොලිතින් බෑගයකට අයිස් කැටදමා තුවායකින් හෝ රෙදි කැබැල්ලක් ඔතා පොට්ටනියක් ලෙස භාවිතා කරමින් හිසමත මිනිත්තු 15 ක් පමණ තබාගෙන සිටින්න.මිනිත්තු 15 ක් පමණ විරාමයක් ගන්න, අවශ්‍ය නම් යළි හිස තවන්න.සීතල නිසා හිසේ රුධිර නාළ සංකෝචනය වී ,රුධිරය පහළ අතට ගැලීම අවම කර ,දැනෙන වේදනාව සමනය කරයි.සීතල වතුරෙන් ස්නානය කිරීම ද විකල්පයකි.
7. උණුසුම් සම්පීඩනය - ආතතිය නිසා ඇතිවන හිස කැක්කුම් තත්වය සමනය වීමට උණුසුමින් හිස තැවීම හොඳ පිළියමකි. හීටිං පෑඩ් එකක් හෝ උණු වතුර පිරවූ බෝතලයකින් හෝ උණුසුම් වතුරේ පෙඟවු තුවායක් ගෙන බෙල්ල, නළල, පිට හා උරහිස් මෘදුව තවන්න.මිනිත්තු 15 ක් පමණ තැවීමෙන් පසුව මිනිත්තු 15 ක විරාමයක් දෙන්න.අවශ්‍ය නම් යළිත් තද ගතියක් දැනෙන පේශී මෙසේ තවාගන්න.උණුසුම් වතුරෙන් ස්නානය කිරීම හෝ උණුසුම් නාන තටාකයට බැස සිටීම ද කළ හැකියි.
8. පීඩන ලක්ෂ්‍යන් සම්බාහනය කිරීම - හිසරදය ඇතිවූ විට බොහෝ දුරට නිරායාසයෙන්ම අපේ ඇඟිලි තුඬු නළල හෝ බෙල්ල සම්බාහනය කිරීමට යොමුවෙයි.සිරුරේ ඇති වේදනා අපහසුත සමනය කරගත හැකි පීඩන ලක්ෂ්‍යන් ගණනාවක් අපේ සිරුරේ තැන් තැන් වල පිහිටා තිබෙයි. අවශ්‍ය වන්නේ එම ස්ථාන වලට සියුම් සම්බාහනයක් ලබාදීමය.ආතතියට හේතුවෙන් ඇතිවන හිසරදය සමනය කරගැනීම සඳහා හකු, නළල දෙකෙලවර හෝ බෙල්ල , ඇහි බැමි අතර මැද ප්‍රදේශය,නාස් පොල්ල දෙපස සම්බාහනය කරන්න.
9. ඇරෝමාතෙරපි (aromatherapy) - සුගන්ධ චිකිත්සාව යන අරුත් ඇති ඇරෝමාතෙරපි වලදී සිදුවන්නේ සගන්ධ තෙල් (එසෙන්ෂියල් ඔයිල්) වැනි සුවඳ ආග්‍රහණය මඟින් සහනයක් සැලසීමයි.ලැවෙන්ඩර් තෙල් මිනිත්තු 15 ක් වැනි කෙටි කලකින් හිසරදය සමනය වීමට ප්‍රතිඵල දෙන බව ඔප්පු වී තිබෙනවා.මීට අමතරව සමන්පිච්ච, පෙපර්මින්ට් වැනි තෙල් වර්ග භාවිතා කළ හැකියි.තනුක කර සමේ ගැල්විය යුතුයි. සුවඳ විලවුන් හෝ එයාර් ෆ්‍රෙෂ්නර් වැනි නිෂ්පාදන වල සුවඳ ප්‍රබල වැඩි නිසා ඒවා භාවිතයෙන් වළකින්න. ඉන් ඔබේ හිසරදය තවත් වැඩිවෙන්නට පුළුවන්.
10. ඇඳුම් හා කොණ්ඩය ලිහිල්කරගන්න - ඇඟට තද ඇඳුම් ඔබේ අපහසුතාව තවත් වැඩි කරයි එම නිසා සැහැල්ලු ලිහිල් ඇඳුමක් අඳින්න.තද පෝනි ටේල් වැනි කොණ්ඩා විලාසිතා නොකරන්න.කොණ්ඩය බුරු කර හිස්කබල සම්බාහනය කරන්න.ඇතැම් කාන්තාවන්ට තදින් කොණ්ඩය ගැටගැසීම නිසාම හිසරදයන් ඇතිවන බව කියවෙනවා. ඒ වගේම හණු සහ දත් තදින් තෙරපීමෙන්(විකාගෙන සිටීමෙන්) වළකින්න. ඉන් ඔබේ අපහසුව තවත් වැඩිවිය හැකිය.
බාම් ටිකක් ගල්වා නළල සම්බාහනය කිරීම ද හොඳ පිළියමකි. ඉහත කිසි පිළියමක් සාර්ථක නොවේ නම්, හිසරදය සුව නොවී දිගින් දිගටම පවතියි නම්,නිසි වෛද්‍ය ප්‍රතිකාර සඳහා යොමුවීම වඩාත් උචිතය.
(උපුටාගැනීමකි)
