ඔබේ සිරුරේ ලෙඩ අඩුකර ප්‍රතිශක්තිය වර්ධනය කරගැනීමට කළ හැකි දේවල් 10ක්
3,674 Views
මේ කාලයේ ප්‍රතිශක්තිකරණ පද්ධතියේ වටිනාකම ගැන කාටවත්ම අමුතුවෙන් කියාදෙන්න ඕනැ නැහැ. ලෝකයේ සෑම අස්සක මුල්ලකම පාහේ ප්‍රතිශක්තිකරණ පද්ධතියේ වටිනාකමත් එහි ක්‍රියාකාරිත්වයේ ඇති වැදගත්කමත් ගැන මිනිසුන් දැනුවත් වෙලයි ඉන්නේ. නමුත් අපි තවත් වරක් ඒ ගැන හැදින්වීමක් කරන්නම්.
අපි ජීවත් වන වටපිටාව තුල සෑම විටකම පාහේ විෂබීජ, බැක්ටීරියා, දිලීර, වෛරස් ආදිය පිරිලයි තියෙන්නේ. අපි ආශ්වාසය කරන කොට, කෑම ගන්නකොට, තුවාල හරහා ආදි ලෙස මේවා අපේ ශරීරයට ඇතුල් වෙනවා. එවැනි වෛරස් එකක් හෝ බැක්ටිරියාවක් ශරීරයට ඇතුල් වූ විට ඒවාට එරෙහිව ප්‍රති වෛරස් සහ ප්‍රති බැක්ටීරියා නිශ්පාදනය කරන්නේත්, ශරීරයේ අනෙක් අවයව වලට එම විෂබීජයට එරෙහිව සූදානම් වීමට අවශ්‍ය දැනුම් දීම සිදු කරන්නේත් ප්‍රතිශතිකරණ පද්ධතිය හරහායි.
අප අද ඔබ වෙත ගෙන එන්නේ ප්‍රතිශක්තිකරණ පද්ධතියේ ක්‍රියාවලිය වඩාත් ශක්තිමත් කිරීමට ඔබට කළ හැකි දේවල් කිහිපයක්. මේ කාලයේ ඔබට මෙය ඉතාම ප්‍රයෝජනවත් වේවි.
01. මී පැණි සහ සූ ලූණු
මීපැණි, විටමින්, ඛණිජ ලවණ, එන්සයිම සහ ප්‍රතිඔක්සිකාරක වලින් පිරී පවතිනවා. මෙය ප්‍රකෘති අණු සමඟ සටන් කරන ප්‍රතිඔක්සිකාර වලිනුත් සමන්විත වෙනවා.
සුදුලූණු වල අඩංගු එක්තරා සංඝටකයක් මගින් වෛරස් වලට එරෙහිව සටන් කිරීමට සුදු රුධිරාණු වලට ඇති හැකියාව වර්ධනය කරවනවා. මේ සඳහා සුදුලූණු කපන්නේ නැතිව තැලිය යුතුයි. තලන විට එම සංඝටකය ක්‍රියාකාරි මට්ටමට පැමිණෙනවා.
මේ ප්‍රතිකර්මය සඳහා ඔබට,
මී පැණි කෝප්ප 1
සුදු ලූණු බික් 8-10 ක් අවශ්‍ය වෙනවා.
වීදුරු භාජනයකට තැලූ සුදුලූණු ටික දමා ඊට උඩින් මී පැණි කෝප්පය වත්කරගන්න. මෙය කාමර උෂ්ණත්වයේ දින 3-5ක් ප්මණ තිබෙන්නට හැර ඉන්පසු ශීතකරණයේ දමාගන්න. එවිට මෙය පාවිච්චි කිරීමට සුදුසුයි. මෙයින් මී මේස හැන්දක් සුදු ලූණු කැබැල්ලකුත් සමඟ දිනපතා කෑමට ගන්න.
02. කහ සහ ඉඟුරු තේ
කහ වල කර්කියුමොනිඩ්ස් නම් ක්‍රියාකාරි සංඝටකය අඩංගු වෙනවා. මෙහි සෞඛ්‍ය ප්‍රතිලාභ රැසක් ඇති අතර ප්‍රති වෛරස් ගුණයත්, ප්‍රතිශක්තිකරණය වර්ධනය කරන ගුණයත් ඉන් සුළු ප්‍රමාණයක් පමණයි.
ඉගුරු වලද ඉතා ශක්තිමත් ප්‍රතිවෛරස් සහ ප්‍රතිබැක්ටීරියා ගුණ ද ප්‍රතිශක්තිය වැඩිකරන ගුණද අන්තර්ගත වෙනවා.
මේ පානය සඳහා,
උණු ජලය කෝප්ප 3
පොත්ත ඉවත් කර ගාගත් 1cm දිග කහ කැබැල්ලක් හෝ අමුකහ කුඩු තේ හැඳි 2ක්
පොත්ත ඉවත් කර ගාගත් 1cm පමණ ඉඟුරු කැබැල්ලක්
වතුර උතුරවාගෙන එයට කහ සහ ඉඟුරු එක් කරගන්න. ඉන්පසු රස අනුව මී පැණි ද අවශ්‍ය නම් එක්කරගෙන පානය කරන්න.
03. ලෙමන් වතුර
ලෙමන් වල අධි මාත්‍රාවක් විටමින් C අඩංගු වෙනවා. එම නිසා මෙය ප්‍රතිශක්තීකරණය වැඩි කරන දිව ඔසුවක් වැනියි. සාමාන්‍ය පරිදි ලෙමන් ගෙඩියක යුෂ ජලය වීදුරුවකට මිශ්‍ර කර, අවශ්‍ය පරිදි සීනි හෝ ගම්මිරිස් දමා පානය කරන්න.
04. ඉඟුරු, ලෙමන් සහ රට මිරිස්
අපි ඉඟුරු වල සහ ලෙමන් වල ගුණ ඉහතින් සඳහන් කර තිබෙනවා. රට මිරිස් වලත් බෙටා කැරොටීන්, විටමින් C සහ ප්‍රති ඔක්සිකාරක අඩංගු වෙනවා. මේවා තරමක් සැර වෙන නිසාම ඔබේ ශරීරයේ උෂ්ණත්වය ද වැඩි කර ප්‍රතිශක්තිකරණ ක්‍රියාවලිය වේගවත් කරනවා.
1 cm පමණ දිග පොතු ඇර තලාගත් ඉඟුරු කැබැල්ලක්
ලෙමන් ගෙඩි භාගයක යුෂ
රට මිරිස් කුඩු තේ හැඳි කාලක්
මේ සියල්ල එකට එකතු කර සෙමෙන් පානය කරන්න. අවශ්‍ය න්ම් මෙයට මී පැණි සහ තලාගත් සුදුලූණු කැබැල්ලක් ද එකතු කරගන්න.
05. එකිනාසියා, මී පැණි සහ වැල්මී
එකිනාසියා කියන පැළෑටි විශේෂය උතුරු ඇමරිකාවට ආවේණික එකක්. මෙහි මුළු ශාකයම ඖෂධ විදියට භාවිතා කරනවා. ලෙමන්, වැල්මී, මී පැණි සම්ඟ එක් කර මෙයින් ඉතාබලවත් ප්‍රතිශක්තීකරණ වර්ධන පානයක් සාදාගත හැකියි.
වැල්මී වලට ද ක්ෂුද්‍රනාශක, බැක්ටීරියා නාශක සහ විශබීජ නාෂක ගුණ සහිත බෙහෙතක්. මෙය නිතරම භාවිතය සුදුසු නැහැ. සතියකට 4-6 වතාවක් පමණ භාවිතා කිරීම නියමිත මාත්‍රාවයි.
වතුර කෝප්ප 4
පොතු ඇර ගාගත් වැල්මී කැබලි කෝප්ප භාගයක්
පොතු ඇර ගාගත් එකිනාසියා මුල් කැබලි කෝප්ප භාගයක්
මී පැණි කෝප්ප 1ක්
ඉඟුරු 5cm කැබැල්ලක් හෝ මේස හැන්දක්
ජලය උණු කර මේ සියල්ල එයට දමා විනාඩි 45ක් පමණ තැම්බෙන්නට හැර බාගෙන, නිවෙන්නට තබා පානය කරන්න.
06. බිම්මල් යුෂ
බිම්මල් යුෂ වල සෞඛ්‍ය ප්‍රතිලාභ විශාල ප්‍රමාණයක් අඩංගු වෙන අතර මෙය චීනයේ පාරම්පරික වෛද්‍ය විද්‍යාවේ වසර දහස් ගණනක් භාවිත කර ඇති ඖෂධයක්.
බිම්මල් ප්‍රතිශක්තිකරණය වර්ධනය කරන ඔසුවක් ලෙස ඉතා ප්‍රකට වන අතර මෙය ප්‍රතිශතිකරණ සෛල රුධිර නාල වල ඇලීම වළක්වනවා. මේ හැකියාව ඇති බිම්මල් වර්ග කිහිපයක් තිබෙනවා. ශිතාකේ, මිතාකේ, කෝර්ඩිසෙප් සහ ට්‍රෙමෙල්ලා ඒ අතරින් ප්‍රධානයි.
07. හරිත යුෂ
මේ පානය ඔබේ ප්‍රතිශක්තිකරණය වර්ධනය කරනවාට අමතටව ඉතාමත් රසවත් ද වෙනවා. නිවිතිය හඳුන්වන්නේ සුපිරි ආහාරය කියලයි. මේකට හේතු වෙන්නේ එහි අඩංගු විටමින්, බෙටා කැරොටින්, ප්‍රති ඔක්සිකාරක ආදි ශරීරයට හිතකර සංඝටක රාශියක් නිසයි.
දොඩම් වලද සෙම්ප්‍රතිශ්‍යාවට සහ උණ රෝග වලට එරෙහිව ක්‍රියා කරන සංඝටක රාශියක් අඩංගු වෙනවා. සැලරිත් විටමින් වර්ග සහ ප්‍රති ඔක්සිකාරක බහුල ආහාරයක්. ඉඟුරු ගැන අපි කලිනුත් සඳහන් කළා.
මේ පානය සඳහා,
නිවිතිය කොළ කෝප්ප 2
දොඩම් ගෙඩි 2
සැලරි දඬු 2
2cm පමණ ඉඟුරු කැබැල්ලක්
මේ සියල්ල බ්ලෙන්ඩරයකින් මිශ්‍ර කොට පානය කරන්න.
08. කොළ ඇපල් සහ කැරට්
ඇපල් සහ කැරට් යන වර්ග දෙකේම විශාල ප්‍රමාණයක් විටමින් සී අඩංගු වෙනවා. නිරෝගි ප්‍රතිශක්තිකරණ පද්ධතියක් සඳහා අත්‍යාවශ්‍ය වෙන විටමින් ඒ බෙටා කැරොටීන් කියන ප්‍රතිඔක්සිකාරකයේ ස්වරූපයෙන් කැරට් වල අඩංගු වෙනවා. මේ දෙකේම යුෂ යොදාගෙන සකස් කරගත හැකි රසවත් පානයකිනුත් ඔබේ ප්‍රතිශක්තිකරණ පද්ධතිය නිරෝගි කරගත හැකියි.
09. තක්කාලි යුෂ
තක්කාලි යුෂ ලබාගෙන ඔබට කැමති ආකාරයකට පානයක් සකස් කරගැනීමට හැකියාව තිබෙනවා. වැදගත්ම දේ වෙන්නේ මේ සඳහා ඔබට බ්ලෙන්ඩරයක් අවශ්‍ය වෙන්නේත් නැහැ. තක්කාලි වල අඩංගු විටමින් B-9 ඔබට රෝග තත්වයන් සමඟ සටන් කිරීමට උපකාරි වෙනවා.
10. රසම්
මෙය ශ්‍රී ලංකාවේ සහ ඉන්දියාවේ විශාල වශයෙන් ජනප්‍රිය ආහාරයක්. ඔබ ඕනෑ තරම් දැකල ඇති රෝගින්ට මෙය ලබා දෙනවා ආහාර රුචිය වැඩි කරන්න. නමුත් මෙහි අඩංගු වෙන කුලුබඩු බොහෝමයක් ඔබට නිරෝගි ප්‍රතිශක්තිකරණ පද්ධතියක් ලබා ගැනීමටද උපකාරි වෙනවා.
(උපුටාගැනීම රැජිණිය වෙබ් අඩවිය)
