අර්ශස් නිට්ටාවට සුවකරගන්න රාබු අල, මුං ඇට ප්‍රතිකාරය
32,992 Views
මූල පලා නමින් අතීතයේ සිට හැඳින්වෙන, ආහාරයට ගැනෙන, රාබු, ආහාර සඳහා මෙන් ම ඖෂධ සඳහාත් යොදා ගන්නා වටිනා ශාකයක්. එය කෘසිපරේසියේ කුලයට අයත්වන්නක්. චීන සම්භවයක් සහිත යි. සංස්කෘතයෙන් මූලක ලෙස හැඳින් වෙන අතර අලවල හැඩරුව අනුව හස්ති දන්තක, මහාකන්ද , දීර්ඝ කන්ද යන නම්වලින්ද හඳුන්වනු ලබනවා. ආහාර රුචිය වඩන්නක් බැවින් ‘රුචිරන්’ නමින් ද හඳුන්වනු ලබනවා.
ශ්‍රී ලංකාවේ සියලු දේශගුණික කලාපවල රාබු වගා කර ගත හැකියි. බෝල රාබු , බීරළු රාබු, රතු රාබු, හා දිග රාබු යන ප්‍රභේද මෙහි වගා කරනු ලබනවා. කඳුරට ජනප්‍රියව ඇති රතුරාබු මාසයක් තුළ අස්වැන්න, නෙළිය හැක්කක් වන අතර එය සලාද සැකසුමට යොදා ගන්නවා. වෑංජන‍ය, තැම්බුම අච්චාරු ව සම්බෝලය යනාදි තවත් විවිධ ක්‍රමවලින් රාබු ආහාරයට ගත හැකියි. රාබු කොළ සලාදයද රසවත් ගුණවත් ආහාරයක් . අල පෙති කපා වියළා, අටුකොස් විලස ආහාරයට ගන්නත් හැකියි.
රාබු මල බද්ධය දුරලන්නක් මෙන්ම විවිධ රෝග වැළැක්වීමේ ශක්තිය ද ඇත්තක්. නිතර ආහාරයට ගැනීමෙන් බොහෝ රෝගවලින් වැළකිය හැකියි.ඇස්කොබික් , ෆෝලික් අම්ල සහ පොටෑසියම් බහුල රාබු විටමින් බී 6 රයිබොෆ්ලේවින්, මැග්නීසියම් කොපර් පොස්පරස් යකඩ කැරටීන් හා මාංශ ජනක ධාතු වලින් පොහොසත්. කාබෝහයි ඩ්‍රේට් බහුල බැවින් මනා ශක්ති ප්‍රභවයක්ද වනවා. ග්‍රෑම් 100 ක කිලෝ කැලරි 20 ක ශක්තියක් ඒවායේ පවතිනවා. ඇතැමුන් අප්‍රිය කරන රාබුවල ඇති ගන්ධය නිකුත්වන්නේ ගෙන්දගම් අධික බව නිසා. ඒවා සිරුරේ රුධිරයෙහි විෂ ඉවත්කර පිරිසිදු කර දෙන ගුණයෙන් යුක්තයි . අක්මාවට ඉතා හිතකරයි. රාබු ආයුර්වේදයේ වා පිත් සෙම් යන තුන් දොසම සමනය කරන්නක් ලෙස සැළකෙනවා. සෙම ආශ්‍රිත, රෝගවලට ගුණ දෙන එය පීනස ඇදුම කැස්ස හා කක්කල් කැස්ස සමනය කරගන්නට උපකාරීවනවා.
එසේම අර්ශස් රෝගයෙන් පෙළෙන්නන්ටත් සහන සලසන්නක්. දිය වැඩියාව ක්ෂය රෝගය, චර්ම රෝග, වාත රෝග, ගැස්ට්රයිටිස් දුරු කරන ශක්තියෙන් යුතුයි. පිත්තාශ, වකුගඩු, පණු රෝග, ආමාශයික ආබාධ , සන්ධි ප්‍රදාහවලට එරෙහිවද ක්‍රියාත්මක වෙනවා. දූවිල්ලට ඇතිවන ඇස් දැවිල්ල කඳුළු ගැලීම ආදි අසාත්මිකතා ද දුරු කරනවා.රාබු අලය මෙන් ම කොළය ද ගුණදායකයි. එම දෙවර්ගය ම එකට ආහාරයට ගැනීමෙන් මුත්‍රා පෙරීම මැනවින් සිදු කෙරෙනවා. රාබු අල කෙටූ යුෂ වලට ජලය ස්වල්පයක් මිශ්‍රකර පානය කිරීම මුත්‍රා ගල් දියවීමට මෙන් ම වකුගඩු පිරිසිදුවීමටත් හේතුවන්නක් බව සඳහන්.
එසේ ම මුත්‍රා දැවිල්ල මුත්‍රා අඩස්සිය, මුත්‍රා අඩුවෙන් යාම, ආදි අපහසුතාවලටත් එය මෙන්ම රාබු තැම්බූ වතුර ද ගුණදායක බව සඳහන් වෙනවා. රාබු අමුවෙන් ගැනීම මුත්‍රා ගල් ඇති අයට හිතකර වුවත් සෙම් රෝග ඇතිවිට අමු රාබු හිතකර නැහැ.දිනපතා රාබු යුෂ වීදුරුවක් සකසාගෙන පානය කිරීමෙන් පිළිකා වළකින බව සඳහන් වෙනවා. රාබු යුෂ වලින් , ක්ෂාර , මූලකාදී වැනි තෙල් වර්ග ද නිෂ්පාදනය කෙරෙනවා. විවිධ ආසාදන නිසා උණ හටගත් විට රාබු යුෂ සහිඳලුණු සමග මිශ්‍රකර දෙනවා . උණට මෙන් ම සෙංගමාලයට ත් රාබු වෑන්ජනය හිතකර බව සඳහන්.
රාබු දුම්බීමට ඇබ්බැහිවූවන්ට ඉන් ම්දීමටත් උපකාරී වන්නක් සේ සැළකෙනවා. ඒ සඳහා රාබු යුෂ තේ හැඳි 3ක් මීපැණි තේ හැන්දක් සමග දිනකට දෙවර බැගින් පානයකළ යුතු බව සඳහන්වෙනවා. හිස් සොරි හා හිසකෙස් ගැලවීම යාම සඳහා රාබු යුෂ හිසේ ගල්වනවා. විටමින් බී සී සින්ක් ආදියෙන් සරු රාබු සමෙහි ඇතිවන කුෂ්ට ළප කැළැල්, වියළි බව දුරුකර, තෙතමනය රඳවා වියපත් පෙනුම ද පමාකර දෙන්නක්. එය සුදුකබර වැනි චර්ම රෝගවලට එරෙහිවද ක්‍රියා කරනවා.
ඉන්දියාව ජපානය වැනි රටවල් රාබු අමුවෙන් ආහාරයට ගැනීමට ප්‍රිය බව සඳහන්. එය ලොව පුරා රට රටවල වගාකෙරෙන්නක්. මැක්සිකෝවේ සංස්කෘතික අංගවලටත් රාබු එක්කරගෙන ඇති අතර ‘රාබු රාත්‍රිය’ නමින් විශේෂ උත්සවයක් ඔවු න් වාර්ෂිකව පවත්වනවා.
දියවැඩියාවට – රාබු අල ඉතා සිහින්ව ලියා, රතුලූනු උම්බලකඩ අමුමිරිස් ආදිය දමා සම්බෝලයක් සේ සකසා නිතර ආහාරයට ගැනීම
කල් ගතවූ කැස්සට – රාබු අල යුෂ ,සහිඳ ලුනු , තිප්පිලි කූඩු මීපැණි දමා මඳක් රත් කොට උදේ හවස මේස ,හැඳි දෙක බැගින් බීම
අර්ශස් ගෙඩිවලට – රාබු අල ,කොළ සිහින්ව ලියා ලුණු මිටක් දමා තම්බා මඳ උණුසුම් විට .ගෙඩි සේදීම. ( රස්නය අඩුවීයන තෙක් )අල කොටා පොට්ටනි බැඳ වංඩුවේ තම්බා තැවීමත් සුදුසුයි
සන්ධි ඉදිමුමට – රාබු කොළ අමුකහ දිය ලුණු දමා කොටා මඳගින්නේ මලවා බැඳීම
සම සුදුවීමේ රෝගයට – රාබු අල පෙති කපා වියළා විනාකිරෙහි දමා වියළෙන්නට හැර ඉඟුරු ඉස්මෙන් අඹරා ආලේප කිරීම
මීමැසි බඹර දෙබර විසට – රාබු කැබැල්ලක් තලා පැළැස්තර දැමීම
අර්ශස්වලට – රාබු අල මුං ඇට ස්වල්පයක් සමග තම්බා තලපයක් කර ටික කලක් දිනපතා ආහාරයට ගැන්ම
සමේ ළප කැලැල් හා වියළි බව දුරුකිරීමට හා යටි පතුල් පැලීමට – ළපටි ,රාබු තලා යෝගට් සමග මිශ්‍රකර ආලේප කිරීම
(මූලාශ්‍ර හා සේයා රූ අන්තර්ජාලය හා වෛද්‍ය, ලේඛන ඇසුරිනි).
