සිරුරේ ශක්තිය ඇති කරවන ස්පර්ශයෙන් වේදනා දුරලන විස්මිත වාත නාශකය ‘වාතභංග’
5,733 Views
නමට ම ගැලපෙන පරිදි වාත වේදනා දුරු කිරිමේ ශක්තිය ඇති වාත භංග වටිනා ඖෂධීය ශාකයක්. එහි පත්‍ර, දේශීය වෙදකමේදී, උග්‍ර වේදනා විඳින වාත රෝගීන්ට තෙල් ගල්වා හැරෙන්නට පෙරළෙන්නට සකසන බෙහෙත් යහන් මත අතුරනයක් ලෙස යොදනු ලබනවා. එසේම කොන්දේ වේදනා ආදියේ දී තැවිලි සාත්තු කිරීම් සඳහා වැතිරෙන යහන මත ද සිරුර ස්පර්ශවන සේ වාතභංග පත්‍ර එළනවා. තවන්නට සකසන මැල්ලුම් වලට ද යොදනවා.
අප්‍රිකානු ආසියානු රටවල සිට ඕස්ට්‍රේලියාව දක්වා පැතිර ඇති වාතභංග ශාකය ශ්‍රීලංකාවේ මෙන්ම ඉන්දියාව චීනය මලයාසියාව ඉන්දුනීසියාව ආදි රටවල ද දක්නට ලැබෙන්නක්. මීටර් 30 ක් පමණ උසට වැඩෙන්නක්. විසල් කොළ පැහැති පත්‍ර සහිතයි. Nyctaginaceae කුලයට අයත්. මෙරට වාත භංග ලෙට්ට කොච්චි, කෙට්ට, කැට කොළ , යන නම්වලින්ද , එතෙර lettuce tree, cabbage tree, moon light tree යන නම්වලින්ද හැඳින්වෙනවා. එළවළුවක් සේ ආහාරයට ගන්නා බැවින් දෝ leafy vegetable ලෙස ත් ව්‍යවහාර වනවා. ගෙවතු උයන් වගාව සඳහාත් මෙහි ප්‍රභේදයක් යොදා ගන්නවා. එහි පත්‍ර කුඩායි. ලා පැහැතියි. ඒවා ආහාර හෝ ඖෂධ පිණිස යොදාගන්නේ නැහැ.
ඖෂධීය ශාකය කැල්සියම් බහුල පෝෂක හා රසායන ගුණ සහිතයි. ආතරයිටිස් දියවැඩියාව වැනි රෝග දුරලන ප්‍රති ඔක්සිකාරක ගුණවලින් යුක්තයි. කොළ මුත්‍රාකාරකයි. රුධිරය පිරිසිදු කරන හැකියාවෙන් යුක්තයි. මුල් විරේක ගුණ සහිතයි. කොළ පැහැති පත්‍ර මැල්ලුම් ලෙස ආහාරයට ගන්නවා. වාත භංග ආහාරයට ගැන්මෙන් වාත වේදනා සුවවීම පමණක් නොව සිරුරේ ශක්තිය ද ඇති කෙරෙනවා. වියපත් වනවිට සිරුරේ බොහෝසෙයින් ඇතිවන වාත වේදනා හා අනෙකුත් දුබලතා දුරුකර ශක්තිය ද ලබාදීමේ සුවිශේෂ හැකියාවක් ඊට අයත්.
දරුවකු ලද අළුත් මවකගේ සෞඛ්‍ය තත්ත්වය ආරක්ෂා කිරීම සඳහා ඇය නැහැවීමට ගන්නා ඖෂධීය කොළවතුර තැම්බුමට, කොහොඹ නික පාවට්ටා ආදි ඖෂධ පත්‍ර අතරට වාත භංග කොළ මිටියක්ද එක්කර ගැනෙනවා.
වාතභංග මුත්‍රා පෙරීම මනා ව සිදුවීමට උපකාරීවෙනවා. මල බද්ධය දුරුකරන අතර , පාචනයට ප්‍රතිකාර සඳහා ද යොදාගන්නවා. එය බරවා රෝගයට එරෙහිවත් ප්‍රතිචාර දක්වනවා. කැඩුම් බිඳුම් තැලුම් වණ තුවාල මෙන් ම, කැස්ස ඇදුම වැනි ශ්වසන රෝගවලටත්, රක්තවාත වැනි වාතරෝග වලටත් ප්‍රතිකාර පිණිස යොදා ගැනෙනවා. සන්ධි ඉදිමුම් වේදනා සහිත රෝගීන්ටත් සහන ලබා දෙනවා. වාත බංග කොළ රුධිරගත සීනි මට්ටම පාලනයට ගත යුතු ආහාරයක් ලෙස දැක්වෙනවා. සිරුරේ දැවිල්ල හා කසන ගති වැතිවිට ත් මැල්ලුම කෑමෙන් සහන අත්වන බව සඳහන්. සිරුරේ තැලුම් ඉදිමුම් සඳහා වාතභංග කොළ ඇල් දියෙන් අඹරා ගානවා. සන්ධි වේදනා ඇතිවූ කල පත්‍ර යුෂ ලුණු සහ දෙහි සමග මිශ්‍රකර ගල්වනු ලබනවා. වාතභංග ආහාරයට ගැන්මෙන් සිරුරට වාසි රැසක් අත්වන අතර ඒ සඳහා කොළ මැල්ලුම සැකසීමේදී, ගොටු කොළ, මුකුණුවැන්න, තෝර, කංකුන් වැනි තවත් පළා වර්ග එකතු කරගැන්මෙන් එහි රස මෙන්ම ගුණ ද වැඩිකර ගත හැකියි.
ලිපිය සැකසුම Indra Rathnay
(මූලාශ්‍ර හා සේයා රූ අන්තර්ජාලය, වෛද්‍ය ලේඛන, හා ඔසුපැළ හඳුනා ගනිමු සමූහයේ පූර්ව සංවාද ඇසුරිනි)
