කරදරකාරී උකුණන් හා සුදු හිසකෙස් නැති කරන සත්කාර රැසක් මෙන්න
7,606 Views
වයසට යාමේදී හිසකෙස් සුදුවීම සාමාන්‍ය දෙයක් වූවත් තරුණ වයසේදී හිසකෙස් සුදුවෙන්න පටන් ගැනීමනම් අසාමාන්‍ය දෙයක්. නමුත් මේ වනවිට බොහෝදෙනා මේ ගැටළුව නිසා අපහසුතාවයට පත්වෙලා සිටිනවා. විවිධ ප්‍රතිකාර කලත් මෙම ගැටළුවට විසඳුමක් සොයා ගැනීමට අපහසුවන අවස්ථා බොහෝය. මෙම ලිපියෙන් කියවෙන ක්‍රම මගින් ඔබේ හිසකෙස් තරුණ වියේදී සුදුවන ගැටළුවට පිළියමක් ලෙස ලබා ගැනීමට හැකිවේවී.
කරපිංචා කොළ කොටා ඉස්ම හිස ගල්වා පැයක් හිඳ සෝදා හරින්න. මීට අමතරව කරපිංචා සම්බෝල ලෙස හෝ කැඳ ලෙස ආහාරයට එක් කර ගැනීමත් වඩාත් සුදුසුයි. තලාගත් ඉඟුරු ස්වල්පයක් මීපැණි මේස හැන්දක මිශ්‍ර කර උදෑසන ආහාරයට ගන්න. කරපිංචා කොළ කීපයක් සහ උළු හාල් ස්වල්පයක් පොල් තෙල් වලට දමා රත් කර හිස ගල්වා පැය කීපයක් තබා සෝදා හරින්න. නෙල්ලි වියලා කුඩු කර පොල් තෙල් සමඟ මිශ්‍ර කර රත්කර හිසෙහි ආලේප කරන්න. පේර කොළ පොඩි කර යුෂ හිස් ගල්වා පැයක් පමණ තබා සෝදා හරින්න. මේ ප්‍රතිකාරය දිනපතා වුවත් කිරීම සුදුසුයි. සති දෙකකට වරක් පිරිසිදු ගී හිස ගල්වා මසාජ් කරන්න. කරවිල යුෂ ඔලිව් තෙල් හෝ තල තෙල් සමඟ මිශ්‍ර කර හිස ගල්වා තබා සෝදා හරින්න.
මීලඟට දැනුවත් කරන්නේ බොහොමයක් පාසල් දැරියන් හා ඇතැම් කාන්තාවන් පීඩා විඳින උකුණු කරදරය පිළිබඳයි.
උකුණන් බෝවීම ඉතා ඉක්මනින් ම සිදු වන්නක්. උකුණන් ඇති අයකු පාවිච්චි කළ කොට්ටඋර, ඇඳ ඇතිරිලි, තුවා මෙන්ම විශේෂයෙන් ම පනාව, කොණ්ඩය සරසන උපකරණ ආදිය පාවිච්චි කිරීමෙන් ඔබටත් උකුණන් බෝවිය හැකියි. එයට අමතරව වසංගතයක් ලෙස හිසෙහි ඉතාමත් අධික සංඛ්‍යාවක් උකුණන් සිටින අයකුට ළංව සිටීමෙන් ද උකුණන් බෝවීම සිදු විය හැකියි.එසේ බෝවන උකුණන් ඔබ අපිරිසුදුව සිටින්නේ නම් ඉතා ඉක්මනින් ම ඔබේ හිසේ උකුණු ජනපද ඇතිකර ගනී.
රුව ලස්සන සමඟින් පිරිසුදු බව ගැන ද උනන්දු විය යුතුයි. එසේ නොමැතිව ලස්සන ගැන පමණක් ම සිතීමෙන් සැබෑ ලස්සනක් ලබා ගත නොහැකියි.උකුණු කරදරයෙන් බේරීම සඳහා සිදු කළ හැකි ස්වාභාවික ප්‍රතිකර්මයක් පහතින් දැක්වේ.
මෙම ප්‍රතිකර්මය සිදු කිරීම සඳහා ඔබට කොහොඹ දලු හා වෙරළු දළු අවශ්‍ය වේ. පිරිසුදු කරගත් කොහොඹ දළුත් වෙරළු දළුත් එකට කොටා තලපයක් සාදා ගත යුතුයි. දැන් මෙම තලපය හිසේ හොඳින් ආලේප කරන්න. එය විනාඩි 20ක් පමණ වේලාවක් තබන්න. ඉන්පසුව දැති සිහින් පනාවකින් හිස හොඳින් පීරන්න. ඉන් අනතුරුව ඔබ හිස සේදීම හෝ නෑම සිදු කළ යුතුයි.මෙම ප්‍රතිකර්මය කිරීමේ දී ඔබ තම සෞඛ්‍ය තත්ත්වය ගැන ද මඳක් සැලකිලිමත් වීම වැදගත් වේ.
ඔබ සෙම් අධික, පීනස් ආදී ලෙඩ රෝග ඇති අයෙක් නම් මෙය සිදු කළ යුත්තේ හොඳින් සූර්යාලෝකය පවතින උණුසුම් දිනවල දී ය. නැතිනම් මේ කොළවර්ග දෙකම සීතල බවින් යුතු නිසා සෙම වැඩි වීමක් සිදු විය හැකියි. මෙය උදෑසන හෝ සවස් වරුවේ සිදු කිරීමෙන් ද සෙම් තත්ත්වන් වැඩි විය හැකිය.
උකුණු කරදරය නිසා සමාජයේ පිළිකුලට ලක් වී කොන් වීමට අවශ්‍ය වන්නේ නැහැ. වෙළෙඳපොළේ ඇති කෘත්‍රිම ආලේපනයන්හි රසායනික ද්‍රව්‍ය අඩංගු නිසා ඒවා භාවිත කිරීමට අකැමැති ඔබට මේ ස්වාභාවික ප්‍රතිකර්මය සිදු කළ හැකියි. මානසිකව හා ශාරීරිකව වද දුන් උකුණු කරදරයෙන් දැන් ඉක්මනින් ම මිදෙන්නට පුළුවන්. ඒ සඳහා අවශ්‍ය වන්නේ උනන්දුව හා ඕනෑකම පමණයි.
සුබ දිවියක් !!!
නේරංජනා කස්තුරිආරච්චි
