බෙලි ගැන අපේ සීයල ආත්තලා අපිට කීව කතාව තමයි මේ. ඌන භාවිත පළතුරක් වෙලා තියෙන බෙලි ගැන අපි කතා කරමු.ඉන්දියාවට ආවේණික පළතුරක් වුවත් බෙලි ගහක් ගෙවත්තක වගා කර ගැනීමෙන් නිවසට සිරිකත වඩිනවා කියලයි අපේ ආත්තම්මා කීවේ. බෙලි ගහේ දැව මුල් පත්‍ර පොතු මල් ගෙඩි මේ හැම දෙයක් ම ඖෂධීය ගුණයෙන් යුතු බැවින් මෙන් ම ඉතා කුඩා ඉඩ කඩක වුවත් බෙලි පැළයක් සිටුවා ගත හැකි බැවින් නිවසේ අලංකාරයට සිටුවා ගැනීමට හොඳ හොඳ ශාකයක්..

මේ තරම් පෝෂණයක් ??
ඉදුණු බෙලි පල්පය ග්‍රෑම් 100 ක කොයි තරම් පෝෂණයක් අඩංගු ද බලමුකෝ..
ශක්තිය කිලෝ කැලරි 137, ජලය ග්‍රෑම් 61.5ක්, පෝටීන් ග්‍රෑම් 1.8ක්, මේදය ග්‍රෑම් 0.39, කාබොහයිඩ්‍රේට ග්‍රෑම් 31.8, කැල්සියම් මිලි ග්‍රෑම් 85 යි , පොස්පරස් මිලි ග්‍රෑම් 50ක් ක් , යකඩ මිලි ග්‍රෑම් 0.6, විටමින් A මයික්‍රෝග්‍රෑම් 0.13, රයිබොප්ලෙවින් මයික්‍රො ග්‍රෑම් 1.19, නියසින් මිලි ග්‍රෑම් 1.1, පෙක්ටීන් 2.5% , විටමින් C මයික්‍රොග්රෑම් 8.8, බෙලි පල්පයේ ඇමයිනෝ අම්ල වර්ග 17ක් පමණ අඩංගුයි.

සන් ක්‍රීම්ද ?? බෙලිද??
තද හිරු එළියට සම නිරාවරණය වීමෙන් ඇති වන සංකූලතා වලට ඔරොත්තුදීමේ හැකියාව බෙලි ආහාරයට ගැනීමෙන් ලැබෙනවා .ඉතින් මොකටද සන් ක්‍රීම්. ඉදුණු බෙලි හදවතට මොළයට ඉතා ගුණදායකයි .

ඉතින් මොකටද සප්ලිමන්ට් ??
අමුබෙලි මද කටුකයි තිත්තයි කෂාය රස යුතුයි .වාතය හා සෙම නසයි .අන්ත්‍ර වල ශක්තිය වැඩි කරයි. ඉදුණු බෙලි මද මධුර රසයි දෝෂ අනුලෝමනයි, අධෝවාත උපදවන සුළුයි.

බෙලි මල් අතීසාරය පිපාසය වමනය නසයි. බෙලි කොළ වාතය නසයි ඉදිමුම් නසයි උණ සමනය කරයි සෙම් නසයි. බෙලි මුල් වාත නසයි ත්‍රි දෝෂ සමනය කරයි. බෙලි ඇට අගනා විරේකයක්. බෙලි පොතු කෂාය රස යුක්තයි කසාය රස යුක්තයි හෘදයට ඉතා හිතකරයි.

මොනවද අත් බෙහෙත් ??
බෙලි කොළ තැම්බූ ජලයහි මඳ උණුසුම් සහිත මත වාඩිවී සිටීමෙන් අර්ශස් වේදනාව සමනය වේ. කොළ කොටා ගත් ඉස්ම මඳක් රත්කර රත් කර තේ හැන්දක් පානය කිරීමෙන් අක්මාව නැවත පණ ගන්වයි. පොතු තම්බා බීමෙන් හෘදයට හිත කරයි , රක්ත වහනය වන රෝගවලට සුදුසුයි , ඉදිමුම නසයි, මුත්‍රා ගල් දියකර හරී(වෛද්‍ය උපදෙස් ලබා ගන්න). බෝවෙන රෝග වලදී කොළ යුෂ ඇසට දැමීම සහ ඇස පිට ආලේප කරයි.

බොඩි ස්ප්‍රේ මොකටද ??
බෙලි කොළ කොටා ගත් යුෂ හෝ කොළ අඹරා හෝ ඇඟේ ගෑමෙන් දහදිය ආදියෙන් උපදින සිරුරේ දුඟද නසයි.

දැඩි වේදනා සහිත අන්ත්‍ර පීඩාවලදී අමු බෙලි ගෙඩියක් පලා මඳ උණුසුම් ජලයෙහි තම්බා පසුදින එළිවන තුරු පින්නේ තබා උදෑසනම සීනි එළුකිරි සමඟ කෑමෙන් වහා සුව ගෙන දෙයි. සෙංගමාලයෙදී බෙලි කොළ කොළ කොටා ගත් යුෂ ගම්මිරිස් කුඩු සමඟ යෙදීමෙන් බඩ යෑම නසා.. ඩෙංගු රෝගයේදී බෙලි ගහේ හටගත් පිළලය යුෂයෙන් කැඳ සකස් කර දීම ගුණදායකයි.

නොපැසුණු බෙලි මඳ වලින් සකස් කර ගන්නා තෙල සිරුරේ සහ අත්පතුල් දැවිල්ලට ඉතාගුණදායක අතරම එළුකිරි ආදිය එක් කර සකස් කර ගන්නා තෙල් කන වත් කිරීමෙන් බිහිරි බව නසයි..

දැන් තේරෙනවා ඇතිනෙ බෙලි කනකොට වෙන දේ ගැන අපේ ආච්චිලා සීයලා කීව කතාව. ඉතින් මෙච්චර වටිනා පළතුරක් පැත්තකට දාලා පිටරටින් ගේන වසවිෂ ගහපු ඇපල් මිදි ගිළින්නේ නැතිව සතියට දවස් දෙක තුනක් වත් අපේ පොඩි එවුන්ටත් එක්ක බෙලි ගෙඩි දෙකක් තුනක් ගෙනත් දෙමු. තෙල් බෙහෙත් නෑ කියල බය නැතිව කන්න පුළුවන්. බෙලි ගැන ඔයාල දන්න දේවල් කමෙන්ට් විදියට ලියන්න. ඒකෙන් මමත් නොදන්න දෙයක් ඉගෙන ගන්නව වගේම ලිපියේ ඌණ පූර්ණයත් වේවි. තෙරුවන් සරණයි.

සෙනරත් නිරෝෂන්