ඔබේ කණේ කලාඳුරු වර්ණයෙන් පෙන්වන සෞඛය තත්වයන් 8 ක්
11,378 Views
ඔබ දන්නවාද ඔබේ කණට ශරීර සෞඛ්‍යය ගැන විස්තර කියන්න පුළුවන් බව? අන්න ඒ නිසා මේ දේවල් 8 මඟහැර ගන්න එපා. මැද කණ දින කිහිපයකට වරක් පිරිසිදු කරන එක හොඳ සෞඛ්‍ය පුරුද්දක්. එහෙම පිරිසිදු කරද්දි දකින්න ලැබෙන කණ්කලාඳුරු වලට අපේ කණ ආරක්ෂා කරන්න විතරක් නෙවෙයි, එහි වර්ණයෙන් විස්තර කියන්නත් පුළුවන්.
මේ වීඩියෝවෙන් අපි ඔබට ඒ ගැන විස්තර කියන්නම්. අපේ කණ තමයි බාහිර දේවල් අහන්නට අපිට උදව් වෙන ඉන්ද්‍රිය. බාහිර කණ, මැද කණ සහ ඇතුළු කණ කියලා කොටස් තුනකින් යුතු වන මෙහි ඇතුළු කණ තමයි අපිට වටපිටාවෙ ශබ්ද මොළයට තේරෙන විධියට පරිවර්තනය කරන්නේ. මෙන්න මේ කොටස බොහොම වැදගත් නිසා
මැද කණේ කණ්කලාඳුරු කියලා ඉටි වර්ගයක් බාහිර කණේ ඉඳලා ඇතුළු වන ආගන්තුක දේවල් නවත්වන්න අපිට උදව් වෙනවා. ඒ වගේම මේකෙන් කණේ කුහරය තෙත්ව පවත්වා ගනිමින් සම වියළී යන එක නවත්වන්නේ බැක්ටීරියා මර්දන හැකියාවනුත් එක්කයි. අපි කෑම හපද්දී යටි ඇන්දේ සිදුවන චලන වලින් කණ්කලාඳුරු පිටවීම උත්තේජනය කරනවා. ඒ කියන්නේ දවසට තුන් පාරක්, නැහැ ඊටත් වඩා වැඩි වාර ගාණක් අපි දන්නෙත් නැතුවම කණ පිරිසිදු වෙනවා.
ඇස් ආරක්ෂා කරන්න කඳුළු, නාස් කුහරය ආරක්ෂා කරන්න සෙම වගේ කණ වෙනුවෙන් තමන්ගේ රාජකාරිය කරන කෙනා තමයි කණ් කළාඳුරු කියන්නේ.
ඉංග්‍රීසියෙන් මේක ear wax ලෙස හැඳින්වූවාට මේක ඉටි ම නෙවෙයි. තෙල්, දාඩිය, මැරුණු සෛල, ලෝම සහ පිටතින් ආපු අපද්‍ර‍ව්‍ය කණ් කළාඳුරුවල අඩංගු වෙනවා.
හරි අපි දැන් බලමු එහි වර්ණයෙන් මොකක්ද අපිට දැනගන්න පුළුවන් කියලා.
කොට්න් බඩ් එකකින් කණ පිරිසිදු කරලා බලද්දි එහි අළු පැහැයක් තැවරිලා තියෙනවා නම් ඒකෙ තේරුම ඔබේ කණ බොහොම නිරෝගීයි කියන එකයි. අළු පැහැය ටිකක් අමුතු පාටක් කියලා හිතුණාට ඇත්තටම ඒ තිබෙන්නේ අපේ කණට ඇතුළු වන කුණු දූවිලි ආදියයි.
මේවා නිසි ආකාරව ඇතුළු කණට යන්න නොදී වළක්වා ගත්තු නිසා තමයි මේ බාහිරින් ඒවා රැඳිලා පිටතට එන්නේ.
නමුත් දිගටම කණ කසන බවක්, වියළි බවක් දැනෙනවා නම් සමේ එක්සිමා (eczema) තත්වයක් වෙන්න පුළුවන්. එවන් තත්ත්වයක් ඇත්නම් වහාම ENT වෛද්‍යවරයෙක් මුණ ගැහෙන්න.
කණ්කළාඳුරු රතු පැහැයක්; ඒ කියන්නේ ලේ පාටකින් තිබෙනවා නම් සහ ලේ දකින්න ලැබුණොත් ඉන් පැහැදිලි වෙන්නේ කණේ මතුපිට සම හෝ කණ් බෙරය ආශ්‍රිතව සිදුරුවී තුවාල ඇතිවී තිබෙන බවයි. මෙය වැඩිකල් පැවතුණහොත් පැසවීමට ලක්වී ඕටයිටිස් නමැති රෝග තත්ත්වය සහ කණේ ඇසීම දුර්වල වීම සිදු වෙනවා. ඒ නිසා එවන් අවස්ථාවකදී කල් නොදා ENT වෛද්‍ය උපදෙස් ගන්න එක වැදගත් දෙයක්.
දුඹුරු පැහැති කණ් කළාඳුරු දකින්න ලැබීම සාමාන්‍ය දෙයක්. අපේ කණේ කණ්කළාඳුරු ඇති වන්නේ ඇපොක්‍රීන් ග්‍රන්ථි වලින්. මේවා වැඩිපුර ස්‍රාවය වෙද්දී අඳුරු වර්ණයක් ගන්නවා. ඔබ නිතර මානසික ආතතියකින්, කාර්යබහුල බව නිසා හිත කරදරයෙන් ඉන්නවා නම් තමයි මේ විධියට වැඩිපුර ස්‍රාවය වීම සිදු වන්නේ. ඉතින් ඔබ නිතර සාංකා තත්ත්වයෙන්, නුරුස්සන ස්වභාවයකින් දවස් ගෙවන බව මෙයින් දැනගන්නට පුළුවන් නිසා ටික දවසක් හිත නිදහස් වෙන්නත් එක්ක ට්‍රිප් එකක් එහෙම යන්න අමතක කරන්න එපා.
කළු පැහැති කණ් කළාඳුරු ඇති වෙන බව ඇහුවාම ටිකක් අමුත්තක් දැනේවි. ඒත් කළු පාටිනුත් ඇති වෙන කණ් කළාඳුරු වලින් කියවෙන්නේ කණ් කළාඳුරු ටිකක් කල් ගතවෙමින් කණේ පැවති බවයි. ඔක්සිජන් එක්ක ඒවා කාලයක් තිස්සේ ගැටෙද්දී තමයි මේ විධියට කළු පැහැ වෙන්නේ. ඒ නිසා මෙයට පොඩ්ඩක්වත් බය වෙන්න අවශ්‍ය නැහැ. ඒත් මේ සමඟ කාලයක් තිස්සේ කණේ දිගටම තද කැසීමක් දැනෙනවා නම් වෛද්‍ය ප්‍රතිකාර වෙත යොමු වීම වැදගත්. මොකද, එහෙම වෙන්නේ කණේ දිලීර ආසාදනයක් නිසා වෙන්න පුළුවන්.
කණ් කළාඳුරු සුදු පැහැයෙන් තිබෙනවා නම් සහ වියළි කැබලි ස්වභාවයක් දකින්නට ලැබෙනවා නම් එයත් සාමාන්‍ය දෙයක්. මේකෙන් කියැවෙන්නේ ඔබේ නිලීන ජානයක් ගැන වෙන්නට පුළුවන්. මෙහෙම තියෙන අයගේ අඳුරු පැහැ කණ් කළුඳුරු තිබෙන අයට වඩා ඒවායේ ගන්ධයත් අඩුයි. කොරියාවේ ජනතාව හැම කෙනෙක්ගේම මෙන්ම උතුරු චීනයේ මේ ආකාරයේ තත්ත්වයක් දකින්නට ලැබෙනවා. නමුත් මෙය ජානමය සාධකයක් නොවේ නම්, ඔබේ මීට කලින් සුදු පැහැයට තිබිලා නැත්නම් එයින් කියැවෙන්නේ ශරීරයේ විටමින් හෝ යකඩ, තඹ වැනි ඛනිජ ලවණ ඌණතාවයක් පවතින බවයි. බෝංචි වර්ග සහ ඕට්ස් ආහාරයට ගන්න පුළුවන් නම් එවන් තත්ත්වයක් ඉක්මණින්ම පාලනය කළ හැකියි.
කණ් කළාඳුරු වලින් දැඩි දුගඳක් හමනවා නම් ඒ මැද කණ හෝ කණ් බෙරය ආශ්‍රිතව ඇතිවුණු දිලීර ආසාදනයක් නිසා වෙන්නට පුළුවන්. එහෙමත් නැත්නම් වැඩි කාලයක් කණේ වතුර හිරවෙලා තිබිලා වෙන්නත් පුළුවන්. වැඩි කාලයක් කණේ වතුර රැඳිලා තිබුණාම දිලීර සහ බැක්ටීරියා එහි වර්ධනය වෙලා ආසාදනය කරනවා. එවිට දැඩි දුගඳක් ඇති වෙනවා මෙන්ම කණ තුළ විවිධ අපහසුතා තත්ත්ව, ඇසීම අඩුවීම, කණ නිතර අගුළු වැටීම් වැනි දේවල් අත්විඳින්නට සිදු වෙනවා. මෙලෙස ආසාදනයවී ඇති බවක් ඔබට දැණුනොත් වැඩිය සුද්ද කරන්න යන්න එපා. එතකොට වැඩේ තවත් වැඩිවෙනවා. කළ යුතු හොඳම දේ තමයි ඉක්මන් වෛද්‍ය ප්‍රතිකාර ගන්නා එක.
කණ් කළාඳුරු දියරමය වශයෙන් කණෙන් පිටතට වැගිරෙන එක සාමාන්‍ය දෙයක්. නමුත් විශාල ප්‍රමාණයෙන් සහ වෙනදා නොමැති ආකාරයට එය වෙනවා නම් ඒකෙන් කියවෙන්නේ කණේ ආසාදන තත්ත්වයක් හෝ ලේ ගැලීමක් ඇතිවෙලා කියන එක වෙන්න පුළුවන්. මෙහෙම වුණාම කණ් බෙරය ආසාදනය වෙලා තිබීමේ අවධානමක් තිබෙන නිසා හැකි ඉක්මණින් උගුර-කණ-නාසය පිළිබඳ විශේෂඥ වෛද්‍යවරයෙක්ගේ උපදෙස් ලබාගන්න.
වියළි කණ් කළාඳුරු වලින් කියවෙන්නේ ඔබේ ශරීරයේ, විශේෂයෙන් සමේ මේද ඌණතාවයක් තිබෙන බවයි. එහෙමත් නැත්නම් ඒ චර්ම රෝගයක් නිසා වෙන්නත් පුළුවන්.
හැබැයි, කණ් කළාඳුරුවල පාට හැරුණාම ඒවා නිසා ඔබ වෛද්‍ය උපදෙස් පැතිය යුතු තවත් අවස්ථාවන් තිබෙනවා. කණ දිගටම අගුළු වැටිලා තිබෙනවා නම්, කණෙන් එක දිගට අමුතු ශබ්දයක් ඇසෙනවා නම්, කණ ඇතුලතින් රිදීමක් දැනෙනවා නම්, දුගඳක් හමමින් කැසීමක් දැනෙනවා නම්, ඇසීම අඩු වෙලා වගේ දැනෙනවා නම් ඉන් පැහැදිලි වෙන්නේ කණේ ප්‍රබල වශයෙන් කණ් කළාඳුරු එක් රැස්වීමෙන් රෝග තත්ත්වයක් ඇතිව තිබෙන බවයි. වැඩිය කල් නොදා එහෙම අවස්ථාවකදී වෛද්‍ය ප්‍රතිකාර ගන්න. කණ් කළාඳුරු විශාල වශයෙන් ඇති වෙනවා නම් ඒවා එකතු වෙලා මෙහෙම කරදර වෙන එක වළක්වා ගන්න තෙතමනයක් ඇති කරවන්න ඕන. සමහර අයගේ මෙහෙම ගොඩක් ආවෙ නැතත්, ජානමය සාධක නිසා ඒවා වියළි ස්වභාවයක් ගන්නවා. එතකොට ඒවා කණ ඇතුලේම රැඳෙන්න බලන ගතිය වැඩියි. ඊට පස්සේ විවිධ රෝගතත්ත්වයන් පසුව ඇතිවෙනවා. ඒක වළක්වාගන්න, බේබි ඔයිල් කුඩා බින්දු කිහිපයක් සතියකට සැරයක් කණට දාන්න. එතකොට ඒවා මෘදු වෙලා, ගොඩගැහෙන්නේ නැතිව හෙමීට පිටතට ඒවි.
එහෙමත් නැත්නම් වෙනත් ක්‍රම වලින් කණ් කළාඳුරු ඉවත් කරන්න පුළුවන්. නමුත් කිසිම අවස්ථාවකදී තියුණු ආයුධ කණට ඇතුළු කරන්න එපා. එයින් කණ තුවාල වෙනවා වගේම මොට වුවත් උල් හැඩැති බව නිසා තවත් කණ් කළාඳුරු කණ ඇතුලට යනවා. හොඳම දේ කොට්න්බඩ් එකකින් මෘදුව කණ් කළාඳුරු පිටතට ගන්නා එකයි. කොට්න් බඩ් එකක් තෝරාගනිද්දීත් හොඳ බ්‍රෑන්ඩ් එකකින් තෝරාගන්න අමතක කරන්න එපා. අඩු මිල ඒවා ගත්තාම ඒවායේ තිබෙන පුළුන් එතුම, එහි කූරට හොඳින් සම්බන්ධ වෙලා නොතිබුණොත් කණ ඇතුලේ හිර වෙනවා. ඊට පස්සේ ඒක ගන්න තවත් කරදර වෙන්න වෙනවා. කුඩා දරුවෙක්ගේ කණට වුණත් කොට්න්බඩ් එකක් දාන්න කලින් පුළුන් ටිකෙන් ටිකක් තදින් ඇදලා බලන්න ඒක ගැලවෙන්න ඔන්න මෙන්න තියෙනවද කියලා. එතකොට ඒ අවධානම අඩු කරගන්න පුළුවන්. කණ් හැඳි නම් කණ පිරිසිදු කරන්න කොහෙත්ම උචිත නැහැ. ගොඩක් ඒවා යකඩ වලින් නිසි ප්‍රමිතියකින් තොරව හදලා තිබෙන නිසා ඒවා කණ ඇතුලේ තුවාල ඇති කරවනවා. ඒ තුවාවල වලට විෂබීජ ගියාම කණ පැසවලා විවිධ රෝග තත්ත්ව ඇතිවෙන්නට පුළුවන්. ඒ වගේම, කොට්න් බඩ් එක් පැත්තක් එක කණකට, එක් වාරයක් විතරක් පාවිච්චි කරලා විසි කළ යුතු වුණාට කණ් හැඳි පිරිසිදු නොකර දිගින් දිගටම පාවිච්චි කළොත් සහ එකම කණ් හැන්ද කීප දෙනෙක් පාවිච්චි කළොත් ඒකෙන් තවත් සෞඛ්‍ය ගැටළු ඇති වෙන්න පුළුවන්. මේ නිසා හැකිතාක් මෘදු කොට්න් බඩ් පාවිච්චියට ම හුරු වෙන්න. කණ් හැඳි බහුලව පාවිච්චි කරපු කාලයේ වෛද්‍ය නිර්දේශය වුණේ කණ කහන්නට ඕනෑ නම් වැලමිටෙන් කහන්න කියලායි. දැන් එහෙම කරන්න පුළුවන්ද කියලා ඔබ බැලුවා නේද? ඇත්තටම එහෙම කරන්න බැරි නිසාම තමයි එහෙම කියලා තියෙන්නේ. කණට විවිධ භයානක දේවල් ඇතුළු කරලා කණ ආශ්‍රිත රෝග ඇති කරවාගැනීම වළක්වා ගන්න ඕන. අඩු තරමේ ඇඟිල්ලෙන් සහ නියපොත්තෙන්වත් කණ ඇතුලට විෂබීජ යාම වළක්වන්න ඇතුලට නොදා ඉන්න එකයි හොඳ.
දැන් අපි කණ ගැන අපූරු කරුණු ටිකකුත් හොයා බලමු.
ඔබ දන්නවාද අපේ ඇඟේ සමබරතාව තියාගන්න ඇතුළු කණ හේතු වන බව? ඇතුළු කණට හානි වුණාම කෙනෙක්ගේ ඇඟේ සමබරතාවයත් නැති වෙනවා. වේගෙන් කැරකුණාම අපි වැටෙන්න යන්නෙත් මේ කණේ තිබෙන සමබරතාව පවත්වාගන්නා දියරයන් ද කැලතෙන්නට පටන් ගන්නා නිසායි. එතකොට ස්නායුවලට විවිධ උත්තේජන ඇතිවෙලා මොළයට විකාර පණිවිඩ එන්න ගත්තාම තමයි අපිට කැරකෙන ගතියක් ඇස්වලටත් දැනිලා බිමටත් වැටෙන්නේ. එහෙම වුණු වෙලාවකදී ආයෙත් ඔබ කැරකුණු පැත්තට විරුද්ධ අතට ආයෙත් චුට්ටක් කැරකුණාම දියර කැලැත්තීම සමබර කරලා බමන ගතිය අඩු කරගන්න පුළුවන්.
ඔබ නිදාගන්න වෙලාවෙදිත් කණට ශබ්ද ඇහෙනවා. අපිට ශබ්ද ඇහෙන්නේ පිට කණෙන් ශබ්ද තරංග මැද කණට යොමු කරලා, ඒ නාලය දිගේ ගිහින් කර්ණපටහ පටලය දෙදරීමට ලක් වෙලා, ඇතුළු කණේ තිබෙන මුද්ගරිකාව, නිඝාතිය සහ ධරණකය කියන කුඩා අස්ථි තුන කම්පනය වුණාම ඒ කම්පනයන් කර්ණශංඛය ඔස්සේ ස්නායු වලින් හඳුනාගෙන මොළයට යැවීමෙනුයි. ඒත් අපි තද නින්දේ ඉඳිද්දි කිසිම සද්දයක් ඇහෙන්නේ නැත්තේ මෙහෙම එන සංඥාවන් හඳුනාගන්න මොළය සූදානම් නොමැති නිසායි. අඩ නින්දේ ඉඳිද්දි ඇහෙන ශබ්ද ගොඩක් වෙලාවට, දකින හීනයේ තිබෙන දෙයක් විධියට පේන අවස්ථාවන්නුත් ඔබ අත්විඳලා ඇති.
තඹරු විජේසේකර
