හැමදාම ලස්සන රැක ගන්න සෑම රාත්‍රියකදීම කළ යුතු රූපලාවන්‍ය පුරුදු 8ක්
8,061 Views
ඔයාගෙ සමේ, මුහුණෙ, හිසකෙස්වල විවිධ විපර්යාසයන් දූවිලි, වාහන දුම, හිරු එළිය වැනි පාරිසරික තත්ත්වයන්ට, දිනපතා නිරාවරණය වෙනවනම් සිදු විය හැකියි. මේ නිසා ඔබේ සමට හානි සිදුවෙනවා. නමුත් රාත්‍රී කාලයේදී ඔබේ සම සැළකිල්ලෙන් රැකබලා ගැනීමෙන් මෙම තත්වය අවම කරගන්න පුළුවන්. ඒ සඳහා රාත්‍රී කාලයේදී අනුගමනය කළ යුතු රූපලාවණ්‍ය පුරුදු 8ක් ගැන තමයි අද අපි ඔබව දැනුවත් කරන්නේ.
මේකප් හොඳින් ඉවත් කරන්න
රාත්‍රී නින්දට යාමට පෙර මුහුණට ගල්වා ඇති සියළුම මේකප් හොඳින් ඉවත් කිරීම ඉතා වැදගත්. ඔබ රෑ නිදාගෙන සිටින විට, ඔබේ සමේ සිදුරු (Skin pores) විවෘත වෙනවා. මේ අවස්ථාවේදී මේකප් හොඳින් ඉවත් කර නොමැති නම් එම සිදුරු අවහිර වන අතර, එය කුරුලෑ, කළු ලප ඇතිවීමට හේතුවක් වෙනවා.
ටෝනර් එකක් භාවිතා කරන්න
දිනපතා රාත්‍රී නින්දට යාමට පෙර මුහුණ හොඳින් ටෝනර් කරන්න. එය ඔබේ සමෙහි ස්වාභාවික pH මට්ටම නැවත ඇති කිරීමට උපකාරී වන අතර බැක්ටීරියා සහ ක්ෂුද්‍ර ජීවීන්ට එරෙහිව සම ඔරොත්තු දෙන පරිදි සකසනවා. ඔබේ සම පිරිසිදු කිරීමටද එය උපකාරී වන අතර තෙල් සහිත හා කුරුලෑ අවදානම සහිත සමට විශේෂයෙන් වැදගත් වෙනවා.
දෑත් වලට ක්‍රීම් එකක් භාවිතා කරන්න
ඔබේ දෑත් දවස පුරා සුමට හා මෘදු ලෙස තබා ගැනීම සඳහා රාත්‍රියේදී නිසි සැලකිල්ලක් දැක්වීම අවශ්‍යයි. මේ සඳහා මෘදු සබන් වර්ගයක් භාවිතා කර දෑත් හොඳින් සෝදාගෙන තුවායෙන් පිසදමා සමට සුදුසු ක්‍රීම් වර්ගයක් ආලේප කරන්න.
ඇස් වටා අලේප කිරීමට ක්‍රීම් එකක් භාවිතා කරන්න
වයසට යාමේ සළකුණු ප්‍රථමයෙන් පෙන්නුම් කරන්නේ ඇස් වටා ප්‍රදේශයෙන්. ඒ නිසා ඔබේ ඇස් වලට නිසි ලෙස සත්කාර කිරීම අවශ්‍යයි. ප්‍රථමයෙන්ම ඇස් වටා ගල්වා ඇති මේකප් හොඳින් ඉවත් කර පසුව නින්දට යාමට පෙර අයි ක්‍රීම් එකක් ආලේප කරන්න. මෙමගින් ඇස් වටා සමට තෙතමනය ලබාදී අඳුරු පැහැ ගැන්වීම් සහ රැළි වැටීම් අවම කරනවා.
දිනපතා රාත්‍රී දත් මදින්න
දිනපතා රාත්‍රී නින්දට යාමට පෙර දත් මැදීම අත්‍යවශ්‍යයි. මෙයින් ඔබේ මුඛය විෂබීජ වලින් තොරව තබාගැනීමට උදව් වනු ඇති අතර දත් කහ පැහැ ගැන්වීම අවම කර සුන්දර සිනහවක් ලබාදෙනවා.
දෙපා වලට ක්‍රීම් එකක් භාවිතා කරන්න
ලස්සන සහ පිරිසිදු දෙපා ඔබේ සුන්දරත්වය මනින එක් සාධකයක් කිවහොත් නිවැරැදියි. රත්‍රී නින්දට යාමට පෙර දෙපා හොඳින් සෝදා පිරිසිදු කරගෙන දෙපා වලට සුදුසු ක්‍රීම් එකක් ආලේප කර මේස් දමා පාද ආවරණය කරගෙන නින්දට යන්න. මෙයින් දෙපා වල වියළි බව දුරු කර තෙතමනය ලබාදෙනවා.
හිසකෙස් ගොතන්න
රාත්‍රී නින්දට යාමට පෙර හිසකෙස් හොඳින් පීරා බන් එකක් ආකාරයට බැඳගන්න, එහෙම නැත්නම් ගොතාගන්න. එසේ කිරීමෙන් හිසකෙස් ගැට ගැසීම අවුල් වීම වළකන අතර උදෑසන පහසුවෙන්ම ඔබට අවශ්‍ය කොණ්ඩ මෝස්තරයක් දමාගන්න පුළුවන්.
සේද ඇඳ ඇතිරිලි සහ කොට්ට උර භාවිතා කරන්න
සේද ඇඳ ඇතිරිලි සහ කොට්ට උර භාවිතා කිරීම ඔබේ සමට මෙන්ම හිසකෙස් වලටද හොඳයි. එමෙන්ම සුවපහසු නින්දක් ලබාගන්නට ද පුළුවන්.
(උපුටා ගැනීම අන්තර්ජාලයෙන්)
