ජීවිත එළිය කරන නිවෙසේ බ්‍රහ්ම පාදය
1,289 Views
යහපත් ජීවිතයක් ගතකිරීමේ අරමුණ ඇතිව නිවෙසක් ගොඩනැගීමට පෙර සැලසුම් ඇඳීමේදී වඩාත් සැලකිලිමත් විය යුත්තේ නිවෙසේ බ්‍රහ්ම පාදය (මධ්‍ය ලක්ෂ්‍යය) අවහිර නොවන ආකාරයට ගැනීමයි. සාලයේ හරි මැද මෙන්ම වැසිකළි ළඟම හෝ කණුවකට, බිත්තියකට සිරවීම් ආදිය ගැනත් සැලකිල්ලක් දැක්විය යුතුය. පොකුණු නිර්මාණය කිරීම, දියඇලි යෙදීම මෙන්ම සාලයේ මධ්‍ය ලක්ෂ්‍යය මත පුටු සැටි හා මේස වැනි ගෘහ භාණ්ඩ තැබීම ඉතා අශුභය.
මා විසින් එක්තරා නිවෙසක වාස්තු පරීක්ෂා කිරීමේදී ගෙයි හරි මැද පුටු සැටි තබා තිබිණි. නිතර පෑගෙන අතර සමහර දිනවලදී මත්පැන් බෝතල් තබාගෙන ඒවා පානය කරමින් මස් මාංශ අනුභව කරන බවද දැනගතිමි. තවත් නිවෙසක කොරිඩෝව හරි මැදට බ්‍රහ්ම පාදය යෙදී තිබිණි. තරුණ දියණියන් නිදන කාමරයටද බ්‍රහ්ම පාදය හසුවී ඇති නිවාස මට හමුවී ඇත. ගබඩා කාමර මෙන්ම වැසිකිළි හා නාන කාමර ආසන්නයේද මධ්‍ය ලක්ෂ්‍යය බ්‍රහ්ම පාදය ඇති නිවාස දැක ඇත්තෙමි.
බිත්තිවලින් සිරවීම හා පල දෙකේ වහලවලට සම්බන්ධිත මුදුන් යට ලී වහලයේ කිඹුල් මූට්ටුද, කුරුපාද එක එල්ලේම බ්‍රහ්ම පාදය මත වැටී තිබෙන අතර තරප්පු පෙළට හරි මැදින්ද දොරටු 3ක් අතරද බ්‍රහ්ම පාදය යෙදී තිබෙන අයුරු කොතෙකුත් මා දැක ඇත්තෙමි.
වාස්තු විද්‍යානුකූලව ඒවා නිදොස් කර පසුව යථා තත්ත්වයට පත් කළෙමි.
නිවෙසේ මුල්ලෙන් මුල්ලට ඉරි දෙකක් හෝ ලණු දෙකක් ඇද මධ්‍ය ලක්ෂ්‍යය සොයාගැනීමට හැකි වන්නේය. එය වඩාත් පහසු වන්නේ අත්තිවාරම දැමූ විටදීය. බිත්ති බැඳීමෙන් පසුව නම් මැනගැනීමෙන් හරි මැද සොයාගැනීමට හැකි වේ. බ්‍රහ්ම පාදය අති පූජනීය තැනකි. හෙළයේ මහා ගත්කරු මාර්ටින් වික්‍රමසිංහ සූරීන් විසූ නිවෙසේ මධ්‍ය ලක්ෂ්‍යයේ එතුමා බිම නොපෑගෙන සේ විශාල මේසයක් තබා සිය ග්‍රන්ථකරණයේ යෙදිණි. අද එතුමාගේ නිවෙස කෞතුකාගාරයකි.
බ්‍රහ්මත්වය ක්‍රියාකිරීමෙන් අති පාරිශුද්ධ පූජනීය වූ බ්‍රහ්ම පාදයෙන් උසස් මානසිකමය නිර්මාණයන් එළිදැක්විය හැකි බැව් පෙනේ.
කරුණු මෙසේ හෙයින් කායික මානසික පීඩනයන්ට ගොදුරුවීම, අධ්‍යාපන කටයුතු අසාර්ථක වීම, පවුලේ දියුණුව අඩාළ වීම, මූල්‍ය සම්පත් විනාශය, යුගදිවි කඩාවැටීම, ශාරීරික ව්‍යාධි, කොඳු ඇට පෙළේ ආබාධ මෙන්ම විවිධ ලෙඩ රෝග ඇතිවීම සිදුවන්නේ බ්‍රහ්ම පාදය අවහිර වීමෙන්, නොසලකා හැරීමෙන් බව වාස්තු පරීක්ෂාවන්හිදී අනාවරණ වී තිබේ.
ආගමික වතාවත් කිරීම, මල් බඳුන් වැනි භාණ්ඩ මෙන්ම සංගීත භාණ්ඩ තැන්පත් කිරීම සුදුසුය.
බ්‍රහ්ම පාදය මත නියම වාලම්පුරි (දක්ෂිණාවෘත්ත සංඛයන්) තබා ලක්ෂ්මි දෙවඟනට පුද පූජා තැබීමද ස්වයංජාත ඇල්වී පිරවූ මැටි පාත්‍රයක සේපාලිකා මුලක්, තඹ කාසියක් තැබීමද සම්පත් ලැබීමට හේතුකාරක වේ.
හැකි අන්දමට බ්‍රහ්ම පාදය ඉතා නිදහස්ව තැබීම සම්පත් ලැබීමට වාසනාව උදාවීමට හේතුවේ. වැල යන පැත්තට මැස්ස ගැසීම නොව, මුලදීම මැස්ස ගහන තැන සොයාබැලීම අගනේය. එසේම නිවෙසක් ඉදිකිරීමේදී සිතිය යුත්තේ මුලින්ම බ්‍රහ්ම පාදය අවහිර නොවන සේ සැලසුම් සකසාගැනීමයි.
බ්‍රහ්ම පාදය නොපෑගෙන සේ තබාගැනීමට මා වසර 50කට අධික කාලයක් පුරා මගේ සේවාදායකයන්ට උපදෙස් දී ඇත්තෙමි. ඒ අය නියම ලෙස ක්‍රියාත්මකවී අද වන විට සතුටින් වාසනාවන්ත ජීවිත ගතකිරීම විශාල පින්කමකි.
(ප්‍රවීණ ජ්‍යොතිෂ සහ වාස්තු විද්‍යා උපදේශක දේශබන්දු ටී.හෙන්රි බෙම්මුල්ල)
